لاہور ( سپورٹس ڈیسک)پاکستان ویمن کرکٹ ٹیم، کپتان فاطمہ ثنا کی قیادت میں پیر کی صبح آئرلینڈ روانہ ہو رہی ہے، جہاں ٹیم ورلڈ کپ 2026 سے قبل تیاریوں کو حتمی شکل دینے کے لیے سہ ملکی ٹی ٹوئنٹی سیریز میں حصہ لے گی۔یہ سیریز آئرلینڈ، پاکستان اور ویسٹ انڈیز کے درمیان 28 مئی سے 4 جون تک ڈبلن میں کھیلی جائے گی۔ ٹورنامنٹ کا مقصد آئندہ آئی سی سی ویمنز ٹی ٹوئنٹی ورلڈ کپ سے قبل کھلاڑیوں کو بھرپور تیاری کا موقع فراہم کرنا ہے۔پاکستان ویمن ٹیم اس سیریز میں ہر ٹیم کے خلاف دو، دو میچز کھیلے گی، جن میں پہلا میچ 29 مئی کو ویسٹ انڈیز کے خلاف ہوگا جبکہ دیگر میچز 31 مئی، 3 جون اور 4 جون کو کھیلے جائیں گے۔اسکواڈ میں عالیہ ریاض، عائشہ ظفر، ڈیانا بیگ، منیبہ علی، نشرہ سندھو، سعدیہ اقبال اور دیگر کھلاڑی شامل ہیں، جبکہ ریزرو کھلاڑیوں میں سدرہ امین اور ام ہانی سمیت کئی نوجوان کرکٹرز کو بھی شامل کیا گیا ہے۔ورلڈ کپ میں پاکستان کا پہلا بڑا مقابلہ 14 جون کو برمنگھم میں روایتی حریف بھارت کے خلاف ہوگا، جبکہ ٹیم گروپ مرحلے میں جنوبی افریقہ، بنگلہ دیش، آسٹریلیا اور نیدرلینڈز کے خلاف بھی میدان میں اترے گی۔اس سے قبل ٹیم کا لاہور میں چار روزہ تربیتی کیمپ مکمل ہوا، جہاں مینٹور وہاب ریاض کی نگرانی میں کھلاڑیوں کی فٹنس اور اسکلز پر خصوصی کام کیا گیا۔ کیمپ کے دوران سینئر کھلاڑیوں نے بھی ٹیم کی حوصلہ افزائی کے لیے ملاقات کی۔
