ریاض( مانیٹرنگ ڈیسک)سعودی عرب میں پاکستانی سفارتخانے نے پاکستانی شہریوں کو سیاسی سرگرمیوں، مظاہروں اور سیاسی نظریات کی تشہیر سے اجتناب کرنے کی ہدایت کردی۔سفارتخانے نے سماجی رابطے کی ویب سائٹ ایکس پر جاری بیان میں کہا کہ سعودی قوانین کے تحت کسی بھی قسم کی سیاسی سرگرمی میں ملوث ہونا ممنوع ہے، اس لیے سیاسی اجتماعات، مظاہروں اور سیاسی جماعتوں کی سرگرمیوں سے دور رہا جائے۔بیان میں پاکستانی شہریوں کو سماجی رابطوں کے ذرائع استعمال کرتے ہوئے مقامی قوانین کی پابندی اور ذمہ داری کا مظاہرہ کرنے کی ہدایت بھی کی گئی۔ غیر مصدقہ خبروں اور افواہوں کی تشہیر، سیاسی یا فرقہ وارانہ بحث و تکرار اور اشتعال انگیز مواد شیئر کرنے سے بھی گریز کرنے کا کہا گیا ہے۔سفارتخانے نے مقامی حکومت کی پالیسیوں پر تنقید یا اشتعال انگیزی پر مبنی مواد سے دور رہنے اور خطے کی سیاسی و سکیورٹی صورتِ حال کو سنسنی خیز انداز میں پیش نہ کرنے کی ہدایت کی۔بیان میں خبردار کیا گیا کہ سعودی قوانین کی خلاف ورزی پر گرفتاری، جرمانہ، قید، ملک بدری اور دوبارہ سعودی عرب میں داخلے پر پابندی سمیت قانونی کارروائی ہوسکتی ہے۔یہ ہدایت ایسے وقت میں سامنے آئی ہے جب پاکستان اور سعودی عرب کے درمیان دفاعی، سفارتی اور دیگر شعبوں میں قریبی تعاون جاری ہے۔
