اسلام آباد( کامرس ڈیسک) رواں مالی سال 2026-27 کے ابتدائی دو ماہ، جولائی اور اگست کے دوران پاکستان نے ایک ارب 70 کروڑ ڈالر کا بیرونی قرض حاصل کیا، جو گزشتہ مالی سال کی اسی مدت کے مقابلے میں 23.60 فیصد زیادہ ہے۔وفاقی حکومت کے جاری کردہ اعداد و شمار کے مطابق موجودہ مالی سال کے دوران حاصل ہونے والا قرض 476 ارب روپے کے مساوی ہے، جبکہ گزشتہ سال اسی عرصے میں 391 ارب روپے کا قرض حاصل ہوا تھا۔اعداد و شمار کے مطابق اس عرصے میں مختلف منصوبوں کے لیے 48 کروڑ 45 لاکھ ڈالر جبکہ منصوبوں کے علاوہ دیگر مدات میں ایک ارب 21 کروڑ ڈالر کی مالی معاونت ملی۔عالمی مالیاتی اداروں نے پاکستان کو 59 کروڑ ڈالر سے زائد قرض فراہم کیا، جس میں اسلامی ترقیاتی بینک سے 19 کروڑ 12 لاکھ ڈالر، عالمی بینک سے 23 کروڑ 84 لاکھ ڈالر شامل ہیں، جبکہ ایشیائی ترقیاتی بینک سے متعلق فراہم کردہ اعداد و شمار میں 9.57 ارب ڈالر درج ہیں۔اقتصادی امور ڈویژن کے مطابق مختلف ممالک نے بھی 3 کروڑ 52 لاکھ ڈالر فراہم کیے، جن میں جرمنی کے ایک کروڑ 28 لاکھ اور سعودی عرب کے 89 لاکھ ڈالر شامل ہیں۔رواں مالی سال اب تک چین نے پاکستان کو کوئی مالی معاونت نہیں دی۔ نیا پاکستان سرٹیفکیٹ کی مد میں 62 کروڑ 97 لاکھ ڈالر جبکہ غیر ملکی تجارتی بینکوں سے 30 کروڑ ڈالر قرض حاصل کیا گیا۔
