کراچی( کامرس ڈیسک)پاکستان کی پہلی ٹیکنیکل مائننگ کانفرنس 6 اگست کو کراچی میں منعقد ہوگی، جس میں عالمی مائننگ کمپنیوں کی شرکت اور بڑی غیر ملکی سرمایہ کاری کے معاہدوں کا امکان ہے۔کانفرنس میں متحدہ عرب امارات، جاپان، جرمنی اور چین کی نمایاں مائننگ کمپنیاں شریک ہوں گی، جبکہ معدنی شعبے میں اربوں ڈالر مالیت کی مفاہمتی یادداشتوں پر دستخط متوقع ہیں۔سندھ اینگرو مائننگ کمپنی کے چیف ایگزیکٹو آفیسر عامر اقبال نے بتایا کہ کانفرنس کا مقصد پاکستان کے معدنی ذخائر میں عالمی سرمایہ کاری کو فروغ دینا اور جدید کان کنی کی ٹیکنالوجی متعارف کرانا ہے۔انہوں نے کہا کہ مستقبل میں ملک بھر کے بجلی گھروں کو تھر کا کوئلہ ریلوے نظام کے ذریعے فراہم کیا جائے گا، جبکہ تھر سے کوئلے کی ترسیل کے لیے نئی ریلوے لائن کا منصوبہ آئندہ سال کے آغاز میں شروع ہونے کی توقع ہے۔عامر اقبال کے مطابق تھر بلاک ٹو کے تیسرے مرحلے پر کام اگلے ماہ شروع کیا جائے گا، جبکہ لکی پاور پلانٹ کو بھی آئندہ ماہ سے تھر کا کوئلہ فراہم کرنے کا آغاز کر دیا جائے گا۔انہوں نے بتایا کہ سندھ اینگرو مائننگ کمپنی میں اب تک ایک ارب 40 کروڑ ڈالر کی سرمایہ کاری ہو چکی ہے، جو پاکستان کے توانائی اور معدنیات کے شعبے میں ایک اہم پیش رفت ہے۔
