پاکستان کے زرمبادلہ ذخائر میں اضافہ، مجموعی ذخائر 22 ارب 64 کروڑ ڈالر سے زائد ہو گئی

کراچی( کامرس ڈیسک) اسٹیٹ بینک آف پاکستان نے ملک کے زرمبادلہ ذخائر سے متعلق تازہ اعداد و شمار جاری کر دیے ہیں۔مرکزی بینک کے مطابق اس ہفتے کے دوران زرمبادلہ ذخائر میں اضافہ ریکارڈ کیا گیا ہے، جس کے بعد مالی صورتحال میں بہتری کے اشارے سامنے آئے ہیں۔اسٹیٹ بینک کے مطابق اس کے اپنے ذخائر میں 6 کروڑ 60 لاکھ امریکی ڈالر کا اضافہ ہوا، جس کے بعد مجموعی ذخائر 17 ارب 14 کروڑ 70 لاکھ ڈالر تک پہنچ گئے ہیں۔رپورٹ میں بتایا گیا ہے کہ کمرشل بینکوں کے ذخائر میں 80 لاکھ ڈالر کی کمی ہوئی، جس کے بعد ان کے مجموعی ذخائر 5 ارب 49 کروڑ 95 لاکھ ڈالر رہ گئے۔اعداد و شمار کے مطابق مجموعی طور پر پاکستان کے زرمبادلہ ذخائر میں 5 کروڑ 80 لاکھ ڈالر کا اضافہ ہوا ہے، جس کے بعد مجموعی ملکی ذخائر 22 ارب 64 کروڑ 65 لاکھ ڈالر تک پہنچ گئے ہیں۔معاشی ماہرین کے مطابق زرمبادلہ ذخائر میں اتار چڑھاؤ معمول کی بات ہے، تاہم مجموعی اضافہ ملکی مالی استحکام کے لیے مثبت اشارہ سمجھا جاتا ہے۔