لاہور( سپورٹس ڈیسک)ٹی ٹوئنٹی ورلڈ کپ کے باقاعدہ آغاز میں اب تین دن سے بھی کم وقت باقی رہ گیا ہے، ایسے میں پاکستان کی جانب سے اختیار کی گئی خاموشی نے انٹرنیشنل کرکٹ کونسل کی تشویش میں اضافہ کر دیا ہے۔ذرائع کے مطابق آئی سی سی حکام پاکستان کرکٹ بورڈ کی جانب سے بھارت کے خلاف میچ کے ممکنہ بائیکاٹ سے متعلق کسی باضابطہ تحریری مؤقف کے منتظر ہیں، تاہم اب تک اس حوالے سے کوئی آفیشل کمیونیکیشن موصول نہیں ہوئی۔دوسری جانب پی سی بی ذرائع کا مؤقف ہے کہ حکومت کی جانب سے واضح اعلان کے بعد بورڈ کی سطح پر کسی اضافی وضاحت یا تحریری موقف دینے کی ضرورت محسوس نہیں کی جا رہی۔پی سی بی ذرائع نے یہ بھی یاد دلایا کہ ماضی میں بھارت نے بھی چیمپئنز ٹرافی کے لیے پاکستان آنے سے متعلق حکومتی اجازت نہ ملنے کا کوئی خط آئی سی سی کی کونسل میٹنگ میں پیش نہیں کیا تھا۔
