غزہ( مانیٹرنگ ڈیسک)ایک انسانی حقوق کی تنظیم نے الزام لگایا ہے کہ اسرائیلی جیلوں میں فلسطینی قیدیوں کو مناسب خوراک نہیں دی جا رہی اور وہاں “بھوک کی پالیسی” نافذ ہے۔رائٹرز کے مطابق رہائی پانے والے قیدی شدید کمزوری اور بیماری کی حالت میں سامنے آئے ہیں۔ نابلس کے سامر خواہیریہ نے بتایا کہ نو ماہ قید کے دوران انہیں صرف چند پتلے ٹکڑے روٹی، تھوڑی حمص اور ہفتے میں دو بار ٹونا دی گئی، جس سے وہ 22 کلو وزن کم کر بیٹھے۔ایسوسی ایشن فار سول رائٹس ان اسرائیل نے مطالبہ کیا ہے کہ قیدیوں تک ریڈ کراس کی رسائی دی جائے اور جیل حکام کے خلاف کارروائی کی جائے۔اسرائیلی حکومت کا مؤقف ہے کہ جیلوں کا انتظام قانون کے مطابق کیا جا رہا ہے، جبکہ وزیر اعظم نیتن یاہو نے سخت گیر وزیر اتمار بن گویر کو جیلوں کی نگرانی سونپی ہوئی ہے۔
