لندن( مانیٹرنگ ڈیسک) برطانوی میڈیا کے مطابق خالصتان تحریک کے رہنما پرم جیت پما کو بھارتی ایجنٹوں سے شدید خطرہ لاحق ہے۔ برطانوی انٹیلی جنس نے انہیں حفاظتی اقدامات اختیار کرنے کا مشورہ دیا ہے۔اخبار گارڈین کے مطابق خطرات کی نوعیت اتنی سنگین ہے کہ پرم جیت پما اب لندن کے علاقے ساوتھ آل میں اپنے گھر میں بھی مقیم نہیں ہیں، اور انہیں اپنی موجودہ رہائش گاہ کا مقام کسی کے ساتھ شیئر کرنے کی اجازت بھی نہیں دی گئی۔پرم جیت سنگھ پما 2023 میں کینیڈا میں قتل ہونے والے خالصتانی رہنما ہردیپ سنگھ نجر اور سکھ فار جسٹس کے رہنما گرپتونت سنگھ پنوں کے قریبی ساتھی سمجھے جاتے ہیں، اور لندن میں بھارتی ہائی کمیشن کے سامنے مظاہروں میں باقاعدگی سے شریک ہوتے رہے ہیں۔پرم جیت سنگھ پما کا کہنا ہے کہ وہ کافی عرصے سے برطانوی پولیس کو موصول ہونے والی دھمکیوں سے آگاہ کرتے آ رہے تھے، لیکن ہردیپ سنگھ نجر کے قتل کے بعد پولیس نے معاملے کو سنجیدگی سے لینا شروع کیا۔ نجر کے قتل کے بعد کینیڈین وزیراعظم جسٹن ٹروڈو نے بھارتی ایجنسیوں پر براہِ راست الزامات عائد کیے تھے۔
