کراچی( ویب ڈیسک) شہریوں کے واٹس ایپ اکاؤنٹس ہیک کرکے ان کے رشتہ داروں اور دوستوں سے رقم ہتھیانے کے لیے سائبر فراڈ کا نیا طریقہ سامنے آگیا۔جعل ساز خود کو معروف کوریئر کمپنی کا نمائندہ ظاہر کرکے شہریوں کو فون کرتے ہیں اور پارسل کی ترسیل یا پتے کی تصدیق کے بہانے موبائل پر موصول ہونے والا واٹس ایپ تصدیقی کوڈ طلب کرتے ہیں۔شہری جیسے ہی یہ کوڈ کال کرنے والے شخص کو بتاتا ہے، جعل ساز اسی نمبر پر اپنے موبائل میں واٹس ایپ رجسٹر کرکے اکاؤنٹ کا اختیار حاصل کرلیتے ہیں۔اکاؤنٹ پر قبضہ کرنے کے بعد فراڈیے متاثرہ شخص کے واٹس ایپ رابطوں کو پیغامات بھیج کر خود کو مشکل میں ظاہر کرتے ہیں اور رشتہ داروں، دوستوں یا ساتھیوں سے فوری مالی مدد کے نام پر رقم طلب کرتے ہیں۔شہری یاد رکھیں: واٹس ایپ کا تصدیقی کوڈ کسی بھی شخص کے ساتھ شیئر نہ کریں، چاہے وہ خود کو کوریئر کمپنی یا کسی ادارے کا نمائندہ ہی کیوں نہ ظاہر کرے۔
