لاہور ( سپورٹس ڈیسک) پاکستان کرکٹ بورڈ نے ڈومیسٹک کرکٹ کے بجٹ میں ایک ارب روپے اضافے کی منظوری دے دی ہے۔چیئرمین پی سی بی محسن نقوی کی زیر صدارت بورڈ آف گورنرز کا 84واں اجلاس منعقد ہوا، جس میں چیف فنانشل آفیسر جاوید مرتضیٰ نے نئے مالی سال کے بجٹ کی تفصیلات اور اعداد و شمار پر بریفنگ دی۔اجلاس میں چیف آپریٹنگ آفیسر سمیر احمد، پی ایس ایل کے چیف ایگزیکٹو آفیسر سلمان نصیر سمیت تمام ڈائریکٹرز نے شرکت کی۔اجلاس میں مالی سال 2026-27 کے سرپلس بجٹ کی متفقہ منظوری دی گئی، جبکہ پی ایس ایل 12 کے بجٹ اور اسے انتظامی و مالی طور پر خودمختار بنانے کی بھی منظوری دی گئی۔ڈومیسٹک کرکٹ کے بجٹ کو 3 ارب روپے سے بڑھا کر 4 ارب روپے کرنے کا فیصلہ کیا گیا۔ اس کے علاوہ نئے سنٹرل کنٹریکٹ کے فارمیٹ، ادائیگی کے طریقہ کار اور قومی کھلاڑیوں کی میچ فیس میں اضافے کی منظوری بھی دی گئی۔قائداعظم ٹرافی کے کھلاڑیوں کی میچ فیس 30 ہزار روپے سے بڑھا کر ایک لاکھ روپے کر دی گئی۔ اسی طرح ویمنز ون ڈے اور ٹی20 ٹورنامنٹس کے انعقاد کے لیے فنڈز مختص کرنے، 12 مزید گراؤنڈز کو فعال بنانے اور انسانی وسائل کے لیے بھی فنڈز منظور کیے گئے۔ریزرو کھلاڑیوں کی میچ فیس 15 ہزار سے بڑھا کر 50 ہزار روپے کرنے اور ریجنل گراؤنڈ اسٹاف کی کم از کم تنخواہ 42 ہزار روپے مقرر کرنے کی بھی منظوری دی گئی۔اجلاس میں نیشنل بینک کرکٹ اسٹیڈیم کراچی سمیت دیگر انفراسٹرکچر کی اپ گریڈیشن کے لیے 6 ارب 70 کروڑ روپے کے فنڈز مختص کرنے کی منظوری دی گئی، جبکہ ہائی پرفارمنس سینٹر لاہور میں بائیو میکینکس مشین کی تنصیب کے لیے بھی فنڈز منظور کیے گئے۔اجلاس میں گزشتہ فیصلوں کی توثیق بھی کی گئی، جبکہ بورڈ آف گورنرز کے اراکین اور دیگر اعلیٰ حکام نے شرکت کی۔
