لاہور ( سپورٹس ڈیسک)پاکستان کرکٹ بورڈ (پی سی بی) نے بہاولپور ریجنل کرکٹ ایسوسی ایشن کے آئندہ ہفتے ہونے والے انتخابات منسوخ کر دیے ہیں۔پی سی بی کی جانب سے جاری کردہ باضابطہ اعلامیے کے مطابق نئے انتخابی شیڈول کا اعلان بعد میں کیا جائے گا۔بورڈ کے مطابق انتخابات کی منسوخی کا فیصلہ متعدد شکایات موصول ہونے کے بعد کیا گیا، جن میں نامعلوم افراد کی مبینہ مداخلت، جھوٹی ایف آئی آرز کے اندراج اور انتخابی عمل میں رکاوٹیں شامل تھیں۔اعلامیے میں کہا گیا ہے کہ ووٹرز اور امیدواروں کی گرفتاریوں اور دھمکی آمیز فون کالز کے باعث انتخابی ماحول متاثر ہوا، جس کے نتیجے میں شفاف انتخابات کا انعقاد ممکن نہیں رہا۔پی سی بی نے واضح کیا ہے کہ صورتحال معمول پر آنے کے بعد نیا انتخابی شیڈول جاری کیا جائے گا۔
