پرامن احتجاج حق، تشدد کی اجازت نہیں، قانون توڑنے والوں سے نمٹیں گے: محسن نقوی

 پشاور( پاکستان خبر)وفاقی وزیر داخلہ محسن نقوی نے کہا ہے کہ پرامن احتجاج ہر شہری کا حق ہے، تاہم احتجاج کی آڑ میں تشدد، توڑ پھوڑ اور سرکاری و نجی املاک کو نقصان پہنچانے کی اجازت نہیں دی جاسکتی۔چارسدہ کے فیڈرل کانسٹیبلری ٹریننگ سینٹر شب قدر کے دورے کے موقع پر انہوں نے اینٹی رائٹ ونگ کی تربیتی مشقوں کا معائنہ کیا اور اہلکاروں کی پیشہ ورانہ صلاحیتوں اور آپریشنل تیاری کو سراہا۔محسن نقوی نے کہا کہ ریاست امن و امان برقرار رکھنے کی ذمہ داری پوری کرے گی اور قانون ہاتھ میں لینے والوں سے قانون کے مطابق نمٹا جائے گا۔ انہوں نے کہا کہ امن و امان کی صورتحال میں فیڈرل کانسٹیبلری کا کردار انتہائی اہم ہے۔وفاقی وزیر نے اہلکاروں کو جدید تربیت، پروٹیکشن گیئر اور گیس ماسک فراہم کرنے کی ہدایت کرتے ہوئے کہا کہ فورس کو ہر قسم کے چیلنج سے نمٹنے کے لیے مکمل طور پر تیار رہنا چاہیے۔انہوں نے ایف سی ہیڈکوارٹر میں کھیلوں کی سہولیات بہتر بنانے، عالمی معیار کا سوئمنگ پول تعمیر کرنے اور اہلکاروں کے واش رومز ازسرنو تعمیر کرنے کی بھی ہدایات دیں۔