پشاور( پاکستان خبر) ہفتے میں دو عدالتی چھٹیوں کے خلاف پشاور ہائیکورٹ میں درخواست دائر کر دی گئی ہے۔ نجی ٹی وی کے مطابق درخواست اطلس خان ایڈووکیٹ نے سلیمان خان ایڈووکیٹ کی وساطت سے دائر کی، جس میں رجسٹرار پشاور ہائیکورٹ کو فریق بنایا گیا ہے۔درخواست میں مؤقف اختیار کیا گیا کہ 12 مارچ کو پشاور ہائیکورٹ نے تین دن عدالتیں بند رکھنے کا نوٹیفکیشن جاری کیا، جو عدلیہ کی آزادی اور عوام کو فوری انصاف کی فراہمی میں رکاوٹ ہے۔درخواست گزار نے مزید کہا کہ عدالتیں ہفتے کے سات دن اور چوبیس گھنٹے کھلی رہنی چاہییں تاکہ عوام بروقت انصاف حاصل کر سکیں، اور ججز عوام کے خادم ہیں، اگر کام نہیں کریں گے تو تنخواہ کے حقدار نہیں۔ انہوں نے اس حوالے سے سپریم کورٹ کے فیصلے اور ضابطہ فوجداری کے سیکشن 352 کا حوالہ بھی دیا۔درخواست میں استدعا کی گئی ہے کہ 12 مارچ کو جاری ہونے والا ہفتے میں تین چھٹیوں کا نوٹیفکیشن کالعدم قرار دیا جائے۔
