اسلام آباد(کامرس ڈیسک) حکومت نے پٹرولیم مصنوعات کی موجودہ قیمتیں آئندہ تین روز تک برقرار رکھنے کا فیصلہ کیا ہے، جبکہ پٹرولیم ڈیلرز کے مارجن میں 1 روپے 34 پیسے فی لٹر اضافہ کردیا گیا ہے۔پٹرول کی قیمت 325 روپے 43 پیسے فی لٹر جبکہ ہائی اسپیڈ ڈیزل 383 روپے 95 پیسے فی لٹر برقرار رہے گا۔اسلام آباد میں وزیر خزانہ محمد اورنگزیب کی زیر صدارت اقتصادی رابطہ کمیٹی کے اجلاس میں پٹرولیم مصنوعات پر ڈیلرز مارجن میں اضافے کی منظوری دی گئی۔ اضافے کے بعد ڈیلرز کا مجموعی مارجن 10 روپے فی لٹر ہوگیا ہے۔حکومتی فیصلے کے بعد پاکستان پٹرولیم ڈیلرز ایسوسی ایشن نے اپنی ہڑتال ملتوی کردی ہے۔ ڈیلرز کے 8 فیصد مارجن کے مطالبے کا جائزہ لینے کے لیے مشترکہ کمیٹی بھی تشکیل دی گئی ہے، جو 30 روز میں اپنی رپورٹ پیش کرے گی۔
