میرپورخاص (پاکستان خبر) سندھ کے سینئر وزیر اور صوبائی وزیر اطلاعات شرجیل انعام میمن نے کہا ہے کہ پنک اسکوٹیز کے غلط استعمال کی روک تھام کے لیے اسٹریٹ چیکنگ کی جائے گی، مردوں کو پنک اسکوٹی چلاتے دیکھا گیا تو اسکوٹی ضبط کرلی جائے گی۔میرپورخاص میں مفت پنک اسکوٹیز کی تقسیم کی تقریب سے خطاب کرتے ہوئے شرجیل میمن نے کہا کہ بے نظیر انکم سپورٹ پروگرام پورے پاکستان کی خواتین کے لیے ہے، شہید محترمہ بے نظیر بھٹو نے خواتین کی خودمختاری کا تصور دیا۔انہوں نے کہا کہ خواتین کے لیے پنک اسکوٹی کا منصوبہ بلاول بھٹو نے شروع کرایا، میرپورخاص میں مفت اسکوٹیز کی تقسیم خواتین کی ترقی کی جانب اہم قدم ہے۔شرجیل میمن نے کہا کہ حلفاً کہتا ہوں خواتین کو مفت اسکوٹیز میرٹ پر دی گئی ہیں، اب تک 50 ہزار خواتین ڈرائیونگ لائسنس کے لیے درخواست دے چکی ہیں، خواہش ہے کہ لائسنس ملنے کے بعد ان تمام خواتین کو اسکوٹیز فراہم کی جائیں۔ان کا کہنا تھا کہ دور دراز علاقوں میں خواتین کے شناختی کارڈ بنانے کا تصور بھی نہیں تھا، پیپلز پارٹی نے خواتین کو خودمختار بنانے کے لیے سب سے زیادہ کام کیا۔صوبائی وزیر نے مزید کہا کہ خواتین کے لیے پنک ٹیکسی بھی جلد شروع کی جائے گی، جبکہ خواتین کو پنک اسکوٹیز فراہم کرنے کا سلسلہ جاری رہے گا۔ سندھ واحد صوبہ ہے جو خواتین کو مفت برقی اسکوٹیز فراہم کر رہا ہے۔
