اسلام آباد (کامرس ڈیسک) وزیراعظم شہباز شریف نے چھوٹے اور درمیانے درجے کے کاروبار اور صنعتوں کی مالی معاونت، فنی استعداد میں اضافے اور عالمی منڈیوں تک رسائی کیلئے جامع حکمت عملی تیار کرنے کی ہدایت کردی۔وزیراعظم کی زیر صدارت اجلاس میں سمیڈا کے تحت چھوٹے اور درمیانے درجے کی صنعتوں اور کاروباری افراد کیلئے جاری معاونتی اقدامات کا جائزہ لیا گیا۔ شہباز شریف نے سمیڈا کو ملک بھر میں کاروباری افراد اور صنعتوں کی مالی معاونت کیلئے مربوط حکمت عملی مکمل کرنے کی ہدایت کی۔انہوں نے کہا کہ سمیڈا کے ادارہ جاتی مقاصد میں ملک کے تمام علاقوں میں کاروبار کے فروغ کے ساتھ یکساں سہولیات اور فنی معاونت کی فراہمی کو ترجیح حاصل ہونی چاہیے۔ وزیراعظم نے کاروباری سرگرمیوں میں خواتین کی شمولیت بڑھانے کیلئے سمیڈا کے پروگرام کو مزید وسعت دینے کی بھی ہدایت کی۔شہباز شریف نے کہا کہ مقامی کاروباری افراد کو ملکی و عالمی تجارتی منڈیوں سے جوڑنے کیلئے ڈیجیٹل پلیٹ فارمز کا مؤثر استعمال کیا جائے۔ انہوں نے سمیڈا کی حکمت عملی میں زیادہ سے زیادہ علاقوں اور شعبوں کو شامل کرنے اور زرعی اجناس کی پیداوار و تجارت کے روابط بہتر بنانے کیلئے خصوصی اقدامات کی ہدایت بھی کی۔وزیراعظم نے کاروباری افراد کو مالی معاونت، فنی تربیت اور دیگر سہولیات کی فراہمی پر یکساں توجہ دینے پر زور دیا۔
