وزیراعظم کا ٹیکس ہدف کیلئے ایف بی آر کے نفاذی اقدامات تیز کرنے کا حکم

اسلام آباد( پاکستان خبر) وزیراعظم شہباز شریف نے ٹیکس اہداف پورے کرنے کے لیے فیڈرل بورڈ آف ریونیو کے نفاذی اقدامات میں تیزی لانے کی ہدایت کردی۔وزیراعظم کی زیر صدارت ایف بی آر اصلاحات پر ہفتہ وار جائزہ اجلاس ہوا، جس میں اصلاحاتی اقدامات پر عملدرآمد مزید تیز کرنے کی ہدایات جاری کی گئیں۔ وزیراعظم نے ٹیکس اصلاحات پر کاروباری برادری کے بڑھتے اعتماد کا خیرمقدم بھی کیا۔شہباز شریف نے ہدایت کی کہ چیئرمین ایف بی آر اور اعلیٰ افسران ہر ماہ کراچی کے ساتھ لاہور میں بھی دو روز قیام کریں۔ انہوں نے کہا کہ مقررہ محصولات کا ہدف حاصل کرنے کے لیے نفاذی کارروائیوں کو مزید مؤثر بنایا جائے اور اسمگلنگ، ٹیکس چوری و غیر قانونی کاروبار کے خلاف کارروائیاں جاری رکھی جائیں۔وزیراعظم نے چکوال اور صوابی میں سگریٹ کی غیر قانونی فیکٹریوں کے خلاف ایف بی آر کی کارروائیوں کو سراہا۔ انہوں نے ایف بی آر کے تمام حساس عہدوں اور شعبوں میں اچھی شہرت رکھنے والے دیانتدار افسران و اہلکار تعینات کرنے کی بھی ہدایت کی۔وزیراعظم نے اندرون ملک محصولات کے لیے مجوزہ غیرملاقاتی نظام کی بروقت تکمیل پر زور دیتے ہوئے ہدایت کی کہ اس نظام کا مکمل نفاذ 2027 تک یقینی بنایا جائے۔