اسلام آباد( کامرس ڈیسک) وزیراعظم شہباز شریف نے وزیر پٹرولیم علی پرویز ملک کو فوری کراچی پہنچ کر آئل ریفائنریز سے مذاکرات کرنے اور ایندھن کی قیمتوں میں کمی کے ذریعے عوام کو ریلیف دینے کی ہدایت کردی۔وزیراعظم سے وزیر پٹرولیم علی پرویز ملک نے ملاقات کی، جس میں وزیر اطلاعات عطا اللہ تارڑ، وزیر اقتصادی امور احد خان چیمہ، وزیر موسمیاتی تبدیلی ڈاکٹر مصدق ملک اور رکن قومی اسمبلی حمزہ شہباز بھی موجود تھے۔ملاقات میں وزیراعظم نے وزیر پٹرولیم کو فوری طور پر کراچی پہنچنے اور مقامی آئل ریفائنریز سے مذاکرات شروع کرنے کی ہدایت کی۔شہباز شریف نے کہا کہ مقامی ریفائنریز میں تیار ہونے والے ڈیزل کی قیمت کم کرنے کے لیے مؤثر اقدامات کیے جائیں۔ انہوں نے کہا کہ ڈیزل کی بڑی مقدار ملک میں ہی تیار ہوتی ہے، اس لیے قیمتوں میں کمی کے امکانات کے حوالے سے ریفائنریز سے مذاکرات جلد مکمل کیے جائیں۔وزیراعظم نے ہدایت کی کہ ہر ممکن طریقے سے عوام کو فوری ریلیف فراہم کیا جائے۔
