اسلام آباد (پاکستان خبر) وزیراعظم شہباز شریف نے وزارتوں کو متعلقہ اعداد و شمار قومی ڈیجیٹل پلیٹ فارم پر فراہم کرنے کیلئے اقدامات تیز کرنے کی ہدایت کردی۔وزیراعظم کی زیر صدارت وفاقی وزارتوں میں ڈیجیٹل نیشن پاکستان پروگرام پر عملدرآمد سے متعلق اجلاس ہوا۔ شہباز شریف نے کہا کہ مرکزی ڈیٹا سینٹر حکومتی خدمات اور شہری سہولتوں کی فراہمی میں اہم کردار ادا کرے گا، جبکہ پروگرام کا مقصد عوام کو مؤثر اور آسان خدمات فراہم کرنا ہے۔انہوں نے کہا کہ تمام شعبوں اور سرکاری اداروں کا ڈیٹا ایک جگہ دستیاب ہونے سے معاشی ترقی میں مدد ملے گی۔ ایندھن پر سبسڈی اسکیم کی کامیاب تکمیل میں بھی اداروں کی مشترکہ کوششوں نے اہم کردار ادا کیا۔وزیراعظم کے مطابق وزارتوں کی ڈیجیٹائزیشن سے بدعنوانی اور ادارہ جاتی بدنظمی کی روک تھام میں مدد ملے گی۔شہباز شریف نے قومی سطح پر یکساں طبی ریکارڈ مرتب کرنے کیلئے وزارت صحت کے اقدامات کو سراہا اور معیاری ادویات کی فراہمی یقینی بنانے کیلئے کیو آر کوڈ کے نفاذ کو بھی قابلِ تحسین قرار دیا۔
