وزیراعظم شہباز شریف کا مولانا فضل الرحمان سے رابطہ، سیاسی صورتحال پر گفتگو

اسلام آباد (پاکستان خبر)وزیراعظم شہباز شریف اور جمعیت علمائے اسلام (ف) کے سربراہ مولانا فضل الرحمان کے درمیان ٹیلیفونک رابطہ ہوا، جس میں ملک کی سیاسی صورتحال اور خیبر پختونخوا کے حالات پر تبادلہ خیال کیا گیا۔ذرائع کے مطابق وزیراعظم کی زیر صدارت اجلاس کے بعد رات گئے مولانا فضل الرحمان سے رابطہ کیا گیا۔ گفتگو میں خیبر پختونخوا کی صورتحال، بالخصوص پاکستان تحریک انصاف کے لانگ مارچ کے حوالے سے بات چیت ہوئی۔ذرائع کا کہنا ہے کہ مولانا فضل الرحمان نے ایک بار پھر اس مؤقف کا اظہار کیا کہ معاملات کو افہام و تفہیم کے ذریعے حل کیا جانا چاہیے۔وزیراعظم شہباز شریف نے کہا کہ مولانا فضل الرحمان کی سیاسی خدمات اور ان کا مفاہمانہ انداز ہمیشہ قابلِ ستائش رہا ہے۔ ان کے مطابق وفاقی حکومت نے معاملات کو سیاسی طریقے سے حل کرنے کی ہر ممکن کوشش کی ہے۔ذرائع کے مطابق وزیراعظم نے کہا کہ پی ٹی آئی کی جانب سے لانگ مارچ پر اصرار اور دہشت گردی کے خلاف اقدامات سے دوری کے باعث مسائل پیدا ہوئے ہیں۔ اب بھی وقت ہے کہ خیبر پختونخوا حکومت اور اپوزیشن معاملات کو حل کرنے کے لیے سنجیدگی کا مظاہرہ کریں۔وزیراعظم نے واضح کیا کہ حکومت اب بھی مذاکرات اور سیاسی حل کے لیے تیار ہے، تاہم اپوزیشن کو وفاق پر چڑھائی سے گریز کرنا ہوگا۔ ان کا کہنا تھا کہ وفاق پر دھاوا بولنے سے مسائل حل نہیں ہوں گے بلکہ مزید پیچیدگیاں پیدا ہوں گی۔ذرائع کے مطابق وزیراعظم نے یہ بھی کہا کہ وفاقی حکومت نے ملکی معیشت کی بہتری کے لیے بھرپور محنت کی ہے اور حکومت ملک میں سیاسی استحکام چاہتی ہے۔