اسلام آباد( و یب ڈیسک) وزیراعظم شہباز شریف نے پاکستان میں گوگل کے نئے دفتر کا افتتاح کردیا، جبکہ گوگل کے نائب صدر ولسن اور ان کی ٹیم سے ملاقات میں ملک میں ڈیجیٹل ٹیکنالوجی کے فروغ، نوجوانوں کے لیے نئے مواقع اور باہمی تعاون بڑھانے پر گفتگو ہوئی۔وزیراعظم نے گوگل کے وفد کو پاکستان آمد پر خوش آمدید کہتے ہوئے کہا کہ گوگل دنیا کی معروف ٹیکنالوجی کمپنیوں میں شامل ہے اور پاکستان میں اس کے لیے وسیع امکانات موجود ہیں۔ انہوں نے کہا کہ گوگل کی پاکستان میں موجودگی دونوں فریقوں کے درمیان نئے اور اہم سفر کا آغاز ہے۔گوگل کے نائب صدر ولسن نے کہا کہ کمپنی پاکستان کے ساتھ طویل المدتی شراکت داری کی خواہاں ہے۔ ان کے مطابق ملک میں ڈیجیٹل ٹیکنالوجی کو مزید فروغ دینے کی ضرورت ہے تاکہ نوجوان جدید ٹیکنالوجی اور ڈیجیٹل معیشت سے زیادہ سے زیادہ فائدہ اٹھا سکیں۔بعد ازاں وزیراعظم نے گوگل کے پاکستان دفتر کا افتتاح کیا۔ اس موقع پر انہوں نے کہا کہ گوگل پاکستانی نوجوانوں اور ٹیکنالوجی کے شعبے کی ترقی میں اہم کردار ادا کرسکتا ہے۔شہباز شریف نے پاکستان اور گوگل کے درمیان تعاون کو مزید وسعت دینے پر زور دیتے ہوئے کہا کہ حکومت ڈیجیٹل ٹیکنالوجی کے فروغ اور نوجوانوں کو جدید مہارتوں سے آراستہ کرنے کے لیے اقدامات جاری رکھے گی۔
