اسلام آباد (پاکستان خبر) وزیراعظم شہباز شریف نے مکہ مکرمہ کے مقدس مقام پر ڈرون حملے کی کوشش کو سخت الفاظ میں قابلِ مذمت قرار دیا ہے۔سماجی رابطے کی ویب سائٹ ایکس پر بیان میں وزیراعظم نے کہا کہ پاکستانی عوام اس اشتعال انگیز اقدام پر غمزدہ اور تشویش میں مبتلا ہیں، اس ناقابلِ معافی فعل سے پہنچنے والے صدمے اور دکھ کو الفاظ میں بیان کرنا ممکن نہیں۔انہوں نے سعودی شاہی مسلح افواج کی بروقت کارروائی، غیر معمولی چوکسی، بہادری اور پیشہ ورانہ صلاحیتوں کو خراجِ تحسین پیش کیا۔شہباز شریف نے تمام فریقین پر زور دیا کہ وہ زیادہ سے زیادہ تحمل کا مظاہرہ کریں، کیونکہ امن کے حصول کا پائیدار راستہ صرف مذاکرات اور سفارت کاری ہے۔وزیراعظم کا کہنا تھا کہ پاکستان برادر ملک سعودی عرب کی خودمختاری اور علاقائی سالمیت کے تحفظ، جبکہ حرمین شریفین کے تقدس اور سلامتی کے معاملے پر ہمیشہ سعودی عرب کے ساتھ شانہ بشانہ کھڑا ہے، جسے ہر پاکستانی اپنا مقدس فریضہ سمجھتا ہے۔
