آزاد کشمیر اسمبلی میں مسلم لیگ ن کی واضح برتری، ارکان کی تعداد 32 ہوگئی

مظفر آباد( پاکستان خبر)آزاد کشمیر قانون ساز اسمبلی میں مخصوص نشستوں کے نتائج کے بعد مسلم لیگ ن نے واضح برتری حاصل کرلی ہے اور حکومت سازی کی پوزیشن مزید مضبوط ہوگئی ہے۔ٹیکنوکریٹ کی نشست پر مسلم لیگ ن کے بیرسٹر افتخار گیلانی 26 ووٹ لے کر کامیاب ہوئے جبکہ پیپلز پارٹی کے ذوالفقار علی کو 12 ووٹ ملے۔ علماء و مشائخ کی نشست پر بھی ن لیگ کے محمد مظہر سعید نے 26 ووٹ حاصل کرکے کامیابی حاصل کی، جبکہ پیپلز پارٹی کے حافظ طارق کو 12 ووٹ ملے۔خواتین کی 5 مخصوص نشستوں میں سے 3 پر مسلم لیگ ن کی مریم زمان، مریم ادریس اور سحرش قمر کامیاب ہوئیں، جبکہ پیپلز پارٹی کی فرزانہ یعقوب اور زوبیہ خورشید راجہ نے بھی نشستیں حاصل کرلیں۔مخصوص نشستوں کے نتائج کے بعد مسلم لیگ ن کے ارکان کی تعداد 32 جبکہ پیپلز پارٹی کے ارکان کی تعداد 14 ہوگئی ہے۔ اوورسیز نشست پر عبدالرحمان آرائیں پہلے ہی بلا مقابلہ منتخب ہوچکے ہیں۔مخصوص نشستوں میں کامیابی کے بعد مسلم لیگ ن کو آزاد کشمیر اسمبلی میں واضح عددی برتری حاصل ہوگئی ہے، جس کے بعد حکومت سازی کا مرحلہ تیز اور وزیراعظم کے انتخاب کی تیاریاں شروع کردی گئی ہیں۔