اسلام آباد( کامرس ڈیسک)بجلی صارفین پر ستمبر میں مزید 36 ارب 54 کروڑ روپے کا مالی بوجھ پڑنے کا امکان ہے۔ذرائع کے مطابق جولائی کی ایندھن قیمت ردوبدل کے تحت بجلی کی فی یونٹ قیمت میں 2 روپے 52 پیسے اضافے کی درخواست پر بجلی کے نگران ادارے نے فیصلہ محفوظ کرلیا ہے۔ منظوری کی صورت میں اضافی رقم ستمبر کے بجلی بلوں میں وصول کی جائے گی۔مرکزی بجلی خریداری ادارے نے جولائی کی پیداواری لاگت کی بنیاد پر قیمت بڑھانے کی درخواست دی تھی۔ مؤقف تھا کہ مہنگے ایندھن کے استعمال سے بجلی بنانے کے اخراجات میں اضافہ ہوا۔سماعت کے دوران ابتدائی طور پر ٹیکس سمیت صارفین پر 41 ارب روپے کا اضافی بوجھ متوقع تھا، تاہم جائزے کے بعد قابل وصول اضافی رقم 36 ارب 54 کروڑ روپے مقرر ہوئی ہے۔
