صدر مملکت اور وزیر اعظم کا کیپٹن محمد سرور شہید کے 78 ویں یوم شہادت پر خراج عقیدت پیش

اسلام آباد( پاکستان خبر) صدر مملکت آصف علی زرداری اور وزیر اعظم محمد شہباز شریف نے پاکستان کے پہلے نشانِ حیدر حاصل کرنے والے کیپٹن محمد سرور شہید کے 78 ویں یوم شہادت پر انہیں پوری قوم کی جانب سے خراج عقیدت پیش کیا ہے۔وزیر اعظم شہباز شریف نے اپنے پیغام میں کہا کہ پوری قوم وطن کے دفاع کے لیے کیپٹن محمد سرور شہید کی عظیم قربانی کو ہمیشہ یاد رکھتی ہے اور انہیں خراجِ تحسین پیش کرتی ہے۔ انہوں نے کہا کہ کیپٹن محمد سرور شہید نے آزادی کشمیر کی پہلی جنگ کے دوران 27 جولائی 1948 کو دشمن کا بہادری اور جرات سے مقابلہ کرتے ہوئے اپنی جان وطن پر قربان کی۔وزیر اعظم نے کہا کہ کیپٹن محمد سرور شہید پہلے پاکستانی ہیں جنہیں مادر وطن کے دفاع میں شاندار قربانی پر نشانِ حیدر سے نوازا گیا۔ انہوں نے محاذ جنگ پر فرض شناسی، بے مثال شجاعت، بہادری اور پیشہ ورانہ صلاحیتوں کا مظاہرہ کرتے ہوئے تاریخ میں اپنا نام ہمیشہ کے لیے روشن کر دیا۔شہباز شریف کا کہنا تھا کہ کیپٹن محمد سرور شہید جیسے عظیم سپوت پاکستان کا فخر اور ملک کے ناقابلِ تسخیر دفاع کی علامت ہیں۔ ان کی لازوال قربانی آنے والی نسلوں کے لیے ہمیشہ مشعلِ راہ رہے گی۔صدر مملکت آصف علی زرداری نے بھی کیپٹن محمد سرور شہید کی برسی پر انہیں خراج عقیدت پیش کرتے ہوئے کہا کہ انہوں نے آزادی کشمیر کے لیے اپنی جان قربان کرکے فرض شناسی، شجاعت اور حب الوطنی کی بے مثال داستان رقم کی۔صدر پاکستان نے کہا کہ پہلے نشانِ حیدر حاصل کرنے والے کیپٹن محمد سرور شہید نے قومی تاریخ میں ایسا روشن باب شامل کیا جسے قوم ہمیشہ احترام اور فخر کے ساتھ یاد رکھے گی۔ انہوں نے کہا کہ پاکستان کے دفاع کے لیے اپنی جانوں کا نذرانہ پیش کرنے والے شہداء ملک کا قیمتی اثاثہ ہیں۔