اسلام آباد( پاکستان خبر) صدرِ مملکت آصف علی زرداری آج سے 9 جولائی تک کرغزستان کا سرکاری دورہ کریں گے، جہاں وہ اعلیٰ سطحی پاکستانی وفد کی قیادت بھی کریں گے۔دفتر خارجہ کے ترجمان کے مطابق یہ دورہ کرغزستان کے صدر کی دعوت پر کیا جا رہا ہے۔ اس دوران صدر آصف علی زرداری کی اپنے کرغز ہم منصب سے ون آن ون ملاقات ہوگی، جبکہ دونوں ممالک کے وفود کے درمیان بھی مذاکرات ہوں گے۔مذاکرات میں باہمی دلچسپی کے علاقائی اور عالمی امور کے علاوہ تجارت، سرمایہ کاری، توانائی، کان کنی، زراعت اور ٹیکسٹائل سمیت مختلف شعبوں میں تعاون بڑھانے پر تبادلہ خیال کیا جائے گا۔ترجمان کے مطابق حلال صنعت، صحت، ادویہ سازی، ڈیجیٹل معیشت، تعلیم، سیاحت اور عوامی روابط کے فروغ سے متعلق امور بھی مذاکرات کا حصہ ہوں گے۔دورے کے دوران صدر آصف علی زرداری کرغزستان کی پارلیمان کے اسپیکر سے بھی ملاقات کریں گے۔دفتر خارجہ کا کہنا ہے کہ گزشتہ 21 برسوں میں کسی پاکستانی صدر کا یہ پہلا سرکاری دورۂ کرغزستان ہے۔ یہ دورہ دسمبر 2025 میں کرغز صدر کے دورۂ پاکستان کے تسلسل میں ہو رہا ہے اور دونوں ممالک کے درمیان بڑھتے ہوئے اعلیٰ سطحی روابط کی عکاسی کرتا ہے۔
