کراچی( کامرس ڈیسک) صدر مملکت آصف علی زرداری نے کیٹی بندر کی ترقی کے لیے مربوط حکمتِ عملی اپنانے کی ہدایت کردی۔صدر آصف زرداری نے کہا کہ منصوبے کے ساتھ سڑکوں کی قابلِ اعتماد رابطہ کاری، بجلی و پانی کی فراہمی، صنعتی ڈھانچے اور دیگر ضروری سہولیات کی دستیابی یقینی بنائی جائے۔انہوں نے کہا کہ کیٹی بندر کو پاکستان کے اضافی بحری گیٹ وے کے طور پر ترقی دے کر بندرگاہی اور رسد کے نظام کو مزید مضبوط کیا جاسکتا ہے۔صدر مملکت نے انڈس ڈیلٹا کے ماحولیاتی تحفظ کے ساتھ مقامی ماہی گیر برادری کے مفادات اور روزگار کو ترجیح دینے پر بھی زور دیا۔واضح رہے کہ چینی کمپنی سی ایچ ای سی نے کیٹی بندر بندرگاہ کا ابتدائی ماسٹر پلان پیش کیا ہے، جس کے پہلے مرحلے کی ابتدائی انجینئرنگ لاگت تقریباً 522.34 ملین ڈالر بتائی گئی ہے۔
