اسلام آباد ( پاکستان خبر) صدرِ مملکت آصف علی زرداری نے خواتین سفارتکاروں کے عالمی دن کے موقع پر ان کی خدمات کو خراجِ تحسین پیش کیا ہے۔اپنے پیغام میں انہوں نے کہا کہ خواتین سفارت کار اقوامِ متحدہ سمیت مختلف عالمی فورمز پر پاکستان کا مؤقف مؤثر انداز میں پیش کر رہی ہیں اور امن، مکالمے اور بین الاقوامی تعاون کے فروغ میں اہم کردار ادا کر رہی ہیں۔صدر زرداری نے کہا کہ پاکستان میں خواتین کی سفارتی خدمات کی ایک روشن روایت موجود ہے، جس میں بیگم رعنا لیاقت علی خان اور شائستہ اکرام اللہ جیسی شخصیات نے عالمی سطح پر ملک کا وقار بلند کیا۔ انہوں نے کہا کہ شہید محترمہ بے نظیر بھٹو نے بھی پاکستان کے عالمی روابط کو مزید مضبوط بنایا۔انہوں نے مزید کہا کہ پاکستانی خواتین سفیر، مستقل مندوبین اور دیگر اعلیٰ سفارتی عہدوں پر نمایاں خدمات انجام دے رہی ہیں، جبکہ موجودہ عالمی حالات میں ان کی ذمہ داریاں مزید بڑھ گئی ہیں۔صدر مملکت کے مطابق آئینِ پاکستان خواتین اور مردوں کو مساوی حقوق اور یکساں قانونی تحفظ فراہم کرتا ہے، اور خواتین سفارت کار ملک کے بین الاقوامی وقار میں اضافہ کر رہی ہیں۔انہوں نے یہ بھی کہا کہ پاکستان دنیا کے ساتھ سنجیدہ، باوقار اور بامقصد سفارتی تعلقات کے فروغ کے لیے پرعزم ہے۔
