اسلام آباد(پاکستان خبر)وزیراعظم شہباز شریف نے ایران اور امریکا کے درمیان طے پانے والی اسلام آباد مفاہمتی یادداشت پر بطور ثالث دستخط کر دیے ہیں۔وزیراعظم آفس کی جانب سے جاری اعلامیے کے مطابق مفاہمتی یادداشت پر امریکی صدر ڈونلڈ ٹرمپ اور ایرانی صدر مسعود پزشکیان کے دستخط پہلے ہی موجود تھے، جبکہ وزیراعظم شہباز شریف نے ثالثی کردار کے تحت اس معاہدے کی توثیق کی ہے۔اعلامیے کے مطابق یہ معاہدہ جنگ کے خاتمے، علاقائی کشیدگی میں کمی اور آبنائے ہرمز میں بحری آمدورفت کی بحالی سے متعلق ہے اور دستخط کے بعد فوری طور پر نافذ العمل ہو گیا ہے۔وزیراعظم شہباز شریف نے سماجی رابطے کے ذریعے اپنے بیان میں کہا کہ معاہدے کے تحت تکنیکی سطح کے مذاکرات 19 جون سے شروع ہوں گے۔ انہوں نے اس پیش رفت کو خطے میں امن، استحکام اور مشترکہ خوشحالی کی جانب ایک اہم قدم قرار دیا۔وزیراعظم نے ایرانی قیادت اور امریکی انتظامیہ کی سفارتی کوششوں کو سراہتے ہوئے کہا کہ اس معاہدے سے ممکنہ بڑے تصادم کا خطرہ ٹل گیا ہے۔ انہوں نے مذاکراتی عمل میں شریک تمام فریقوں کی کاوشوں کو بھی خراجِ تحسین پیش کیا۔شہباز شریف نے مزید کہا کہ پاکستان نے ثالث کے طور پر تعمیری کردار ادا کیا اور امید ہے کہ یہ معاہدہ خطے میں پائیدار امن اور اقتصادی تعاون کے نئے مواقع پیدا کرے گا۔
