اسلام آباد( ویب ڈیسک) پاکستان ٹیلی کمیونیکیشن اتھارٹی (پی ٹی اے) اور میٹا کے درمیان نوجوانوں اور بچوں کے آن لائن تحفظ، محفوظ ڈیجیٹل ماحول کے فروغ اور ڈیجیٹل فلاح و بہبود کے لیے لیٹر آف انٹینٹ پر دستخط کر دیے گئے۔معاہدے کے تحت پاکستان میں آن لائن مواد کے تحفظ، محفوظ ڈیجیٹل پلیٹ فارمز کے فروغ اور صارفین کی حفاظت سے متعلق مختلف شعبوں میں باہمی تعاون کو فروغ دیا جائے گا۔پی ٹی اے اور میٹا نوجوانوں اور بچوں کی آن لائن حفاظت، ذمہ دارانہ ڈیجیٹل رویوں کے فروغ، عوامی آگاہی مہمات، پالیسی مکالمے اور ادارہ جاتی استعداد کار بڑھانے کے لیے مشترکہ اقدامات کریں گے۔اس شراکت داری کے تحت دونوں ادارے متعلقہ اداروں کی صلاحیت میں اضافے، بین الاقوامی بہترین تجربات سے استفادہ اور آن لائن خطرات سے نمٹنے کے لیے مؤثر حکمت عملی مرتب کرنے میں بھی تعاون کریں گے، تاکہ بالخصوص نوجوان صارفین کے لیے زیادہ محفوظ اور قابلِ اعتماد ڈیجیٹل ماحول فراہم کیا جا سکے۔اس موقع پر چیئرمین پی ٹی اے حفیظ الرحمٰن نے کہا کہ ادارے کا بنیادی مقصد صارفین کے لیے محفوظ، قابلِ اعتماد اور ذمہ دار ڈیجیٹل ماحول کی فراہمی ہے۔انہوں نے کہا کہ میٹا کے ساتھ یہ شراکت داری بچوں اور نوجوانوں میں ذمہ دارانہ آن لائن رویوں کے فروغ، ڈیجیٹل آگاہی میں اضافے اور آن لائن تحفظ کے نظام کو مزید مؤثر بنانے میں اہم کردار ادا کرے گی۔چیئرمین پی ٹی اے نے اس عزم کا اظہار کیا کہ دونوں ادارے مشترکہ کوششوں سے پاکستان میں ڈیجیٹل تحفظ کے معیار کو مزید مضبوط بنانے کے لیے مل کر کام کریں گے۔
