اسلام آباد( ویب ڈیسک) پاکستان ٹیلی کمیونیکیشن اتھارٹی نے سوشل میڈیا پر نازیبا، اشتعال انگیز اور دیگر قابلِ اعتراض مواد کے خلاف کارروائیاں جاری رکھتے ہوئے گزشتہ 10 برس کے دوران 15 لاکھ 42 ہزار 800 روابط بند کیے ہیں۔پی ٹی اے کے ترجمان کے مطابق قابلِ اعتراض مواد کے خلاف کارروائی کی شرح 90 فیصد تک پہنچ گئی ہے۔ اخلاقی اقدار کے منافی مواد پر مشتمل 10 لاکھ 65 ہزار سے زائد روابط بند کیے گئے، جن میں فیس بک کے 2 لاکھ 30 ہزار، ٹک ٹاک کے 1 لاکھ 70 ہزار اور ایکس کے 74 ہزار سے زائد روابط شامل ہیں۔رپورٹ کے مطابق یوٹیوب کے 66 ہزار سے زائد روابط بند کیے گئے اور اس حوالے سے کارروائی کی شرح 88.6 فیصد رہی۔ اسی طرح واٹس ایپ کے 50 ہزار اور انسٹاگرام کے 45 ہزار سے زائد روابط بھی بند کیے گئے۔پی ٹی اے کے مطابق دہشتگردی سے متعلق ایک لاکھ 41 ہزار سے زائد روابط، قومی سلامتی اور دفاع کے خلاف 74 ہزار سے زائد روابط جبکہ اسلام مخالف مواد پر مشتمل ایک لاکھ 12 ہزار 482 روابط بند کیے گئے۔فرقہ وارانہ اور نفرت انگیز مواد کے 52 ہزار سے زائد روابط بھی بند کیے گئے، جبکہ پراکسی ویب سائٹس کے خلاف کارروائی کرتے ہوئے 99.99 فیصد روابط کو بلاک کیا گیا۔پی ٹی اے کے مطابق مذکورہ عرصے کے دوران 17 لاکھ سے زائد شکایات پر کارروائی کی گئی، 76 ہزار سے زائد شکایات تاحال زیرِ جائزہ ہیں، جبکہ ایک لاکھ سے زیادہ درخواستیں مسترد کی جا چکی ہیں۔
