پی ٹی اے کا غیرقانونی سمز کے خلاف کریک ڈاؤن، 18 لاکھ سے زائد سمز بند

اسلام آباد( ویب ڈیسک) پاکستان ٹیلی کمیونیکیشن اتھارٹی (پی ٹی اے) نے غیرقانونی سمز کے استعمال اور غیرملکی سمز کی غیرقانونی فروخت کے خلاف کارروائیاں مزید تیز کر دی ہیں، جس کے دوران رواں سال کے ابتدائی 7 ماہ میں 18 لاکھ 38 ہزار 689 سمز بلاک کر دی گئیں۔پی ٹی اے کے مطابق جنوری سے اب تک 6 لاکھ 91 ہزار 102 غیرقانونی سمز بند کی گئیں، جبکہ ایسے موبائل نمبرز بھی بلاک کیے گئے جو فوت شدہ افراد کے شناختی کارڈز پر رجسٹرڈ تھے، ان کی تعداد 9 لاکھ 3 ہزار 230 ہے۔اتھارٹی کا کہنا ہے کہ متعدد انتباہات کے باوجود فوت شدگان کے شناختی کارڈز پر رجسٹرڈ سمز کے استعمال پر کارروائی کی گئی۔اس کے علاوہ منسوخ یا زائد المیعاد شناختی کارڈز پر رجسٹرڈ 2 لاکھ 44 ہزار 357 سمز بھی بند کر دی گئی ہیں۔پی ٹی اے نے غیرملکی سمز کی غیرقانونی فروخت کے خلاف بھی کارروائیاں جاری رکھیں، جن کے دوران 25 چھاپوں میں 8 ہزار 51 غیرملکی سمز برآمد کی گئیں جبکہ 37 افراد کو گرفتار کیا گیا۔پی ٹی اے کے مطابق ٹیلی کام نظام کو محفوظ بنانے اور غیرقانونی سمز کے استعمال کی روک تھام کے لیے کارروائیاں مستقبل میں بھی جاری رکھی جائیں گی۔