اسلام آباد( ویب ڈیسک) پاکستان ٹیلی کمیونیکیشن اتھارٹی نے موبائل فون خریدنے والے صارفین کے لیے اہم ہدایات جاری کرتے ہوئے کہا ہے کہ غیر قانونی یا غیر رجسٹرڈ موبائل فون خودکار نظام کے تحت بند کر دیے جاتے ہیں۔پی ٹی اے کے مطابق ’’ڈیوائس شناخت، رجسٹریشن اور بلاکنگ نظام‘‘ کے تحت ایسے موبائل فونز، جو ادارے سے منظور شدہ نہ ہوں، خودکار طور پر بلاک کر دیے جاتے ہیں۔ادارے کا کہنا ہے کہ فراڈ، سمگلنگ اور دیگر غیر قانونی سرگرمیوں کی روک تھام کے لیے یہ نظام متعارف کرایا گیا ہے، جو ملک میں موبائل فونز کی رجسٹریشن کو یقینی بناتا ہے۔پی ٹی اے کے مطابق غیر رجسٹرڈ بین الاقوامی موبائل آلات کے شناختی نمبرز رکھنے والی ڈیوائسز اس نظام کے ذریعے بند کر دی جاتی ہیں، جس کے باعث صارفین کو مشکلات کا سامنا کرنا پڑ سکتا ہے۔اتھارٹی نے صارفین کو ہدایت کی ہے کہ موبائل فون خریدنے سے قبل اس کی قانونی حیثیت کی تصدیق کریں، جبکہ وفاقی بورڈ آف ریونیو کے مقررہ محصولات ادا کر کے اپنی ڈیوائس کو پی ٹی اے سے رجسٹر ضرور کروائیں۔
