پی ٹی اے کی سائبر فراڈ سے بچاؤ کے لیے نئی ایڈوائزری جاری، مضبوط پاس ورڈ استعمال کرنے کی ہدایت

 اسلام آباد( ویب ڈیسک)پاکستان ٹیلی کمیونیکیشن اتھارٹی (پی ٹی اے) نے سائبر فراڈ سے تحفظ اور ڈیجیٹل سکیورٹی کو بہتر بنانے کے لیے نئی ایڈوائزری جاری کر دی ہے۔ایڈوائزری میں صارفین کو ہدایت کی گئی ہے کہ وہ اپنے آن لائن اکاؤنٹس کے تحفظ کے لیے مضبوط اور منفرد پاس ورڈز استعمال کریں اور محفوظ ڈیجیٹل عادات اپنائیں۔پی ٹی اے کے مطابق شہریوں کو چاہیے کہ وہ ڈیجیٹل تحفظ کے لیے دو مرحلوں پر مشتمل تصدیق (ٹو فیکٹر آتھنٹیکیشن) کو فعال کریں اور ایک سے زائد اکاؤنٹس کے لیے ایک ہی پاس ورڈ استعمال کرنے سے گریز کریں۔اعلامیے میں کہا گیا ہے کہ مختصر یا آسان پاس ورڈز سائبر خطرات میں اضافے کا سبب بن سکتے ہیں، اس لیے ذاتی معلومات جیسے نام، تاریخ پیدائش یا آسان نمبرز کو پاس ورڈ کے طور پر استعمال نہ کیا جائے۔پی ٹی اے نے مزید ہدایت کی ہے کہ صارفین اپنے پاس ورڈز کسی کے ساتھ شیئر نہ کریں اور انہیں باقاعدگی سے تبدیل کرتے رہیں۔ادارے کے مطابق فنگر پرنٹ اور چہرے کی شناخت جیسے بائیومیٹرک فیچرز کو ترجیح دینا بھی ڈیجیٹل تحفظ کو مزید مؤثر بنا سکتا ہے۔ پی ٹی اے نے کہا ہے کہ مضبوط پاس ورڈ محفوظ ڈیجیٹل مستقبل کی ضمانت ہے اور شہریوں کو ان ہدایات پر مکمل عمل کرنا چاہیے۔