اسلام آباد( پاکستان خبر) بانی پی ٹی آئی عمران خان کی 6 اور بشریٰ بی بی کی ایک ضمانت قبل از گرفتاری کی درخواستیں منظور کر لی گئیں۔ڈسٹرکٹ اینڈ سیشن کورٹس اسلام آباد میں ایڈیشنل ڈسٹرکٹ اینڈ سیشن جج محمد افضل مجوکہ نے تحریری فیصلے جاری کیے، جن کے مطابق توشہ خانہ جعلی رسیدوں کے کیس میں دونوں کی ضمانت منظور کی گئی۔عدالت نے فیصلے میں کہا کہ پراسیکیوشن بانی پی ٹی آئی اور بشریٰ بی بی کے خلاف کوئی ٹھوس ثبوت پیش نہیں کر سکی۔ پراسیکیوشن نے کہا کہ رسید سوشل میڈیا پر دیکھی گئی، تاہم فرانزک رپورٹ آج تک پیش نہیں کی گئی۔عدالت نے مزید لکھا کہ بانی پی ٹی آئی اور بشریٰ بی بی نے جعلی رسیدیں الیکشن کمیشن یا کیبنٹ ڈویژن میں جمع کروائیں، اس کا کوئی ثبوت فراہم نہیں کیا گیا۔ اعلیٰ شخصیات کے خلاف الزام تراشی کے مقدمات میں بھی ضمانت منظور ہوئی، اور پراسیکیوشن فوج یا دیگر معاملات کے حوالے سے کوئی قابل قبول ثبوت پیش نہیں کر سکی۔
