اسلام آباد( پاکستان خبر)بانی پی ٹی آئی کی اسپتال منتقلی کے معاملے پر سپریم کورٹ کے رجسٹرار آفس نے ان کی بہن کی جانب سے دائر توہین عدالت کی درخواست اعتراض عائد کرکے واپس کردی۔ذرائع کے مطابق درخواست کے ساتھ فریقین پر عائد توہین عدالت کے الزامات کی فہرست فراہم نہیں کی گئی تھی۔واضح رہے کہ 22 اگست کو پاکستان تحریک انصاف نے بانی پی ٹی آئی کی اسپتال منتقلی کے معاملے پر توہین عدالت کی درخواست سپریم کورٹ میں دائر کی تھی۔ درخواست عزیر بھنڈاری اور سلمان اکرم راجہ کے ذریعے جمع کرائی گئی۔درخواست میں مؤقف اختیار کیا گیا تھا کہ سپریم کورٹ کے 18 اگست 2026 کے حکم کی مبینہ خلاف ورزی پر توہین عدالت کی کارروائی شروع کی جائے۔درخواست گزاروں نے مبینہ مرتکبین کو اظہار وجوہ کے نوٹس جاری کرنے، ذاتی حاضری کا حکم دینے اور جواب دہندگان کو توہین عدالت کا مرتکب قرار دے کر قانون کے مطابق سزا دینے کی استدعا بھی کی تھی۔
