اسلام آباد( پاکستان خبر) پاکستان تحریک انصاف اور جمعیت علمائے اسلام (ف) نے پارلیمان میں مشترکہ اپوزیشن کی حکمت عملی مرتب کرنے کے لیے خصوصی کمیٹی قائم کرنے کا فیصلہ کرلیا۔ذرائع کے مطابق کمیٹی میں دونوں جماعتوں کے ارکان شامل ہوں گے، جبکہ پی ٹی آئی اور جے یو آئی (ف) کمیٹی کے لیے اپنے نام مرکزی قیادت کو فراہم کریں گی۔ذرائع کا کہنا ہے کہ خصوصی کمیٹی پارلیمانی معاملات اور قانون سازی سمیت حکومت کو پارلیمان کے اندر مؤثر انداز میں جواب دینے کے لیے تجاویز تیار کرے گی۔ کمیٹی کو اجلاسوں کے بائیکاٹ سمیت اہم پارلیمانی فیصلے کرنے کا اختیار بھی حاصل ہوگا۔ذرائع کے مطابق دونوں جماعتوں کے ارکان کمیٹی کی جانب سے طے کردہ حکمت عملی اور جاری کردہ ہدایات پر عمل کرنے کے پابند ہوں گے۔مشترکہ پارلیمانی کمیٹی بنانے کا فیصلہ گزشتہ شب اپوزیشن کی مشترکہ پارلیمانی پارٹی کے اجلاس میں کیا گیا، جس میں پارلیمان کے اندر حکومت کے خلاف مشترکہ حکمت عملی اختیار کرنے پر اتفاق ہوا۔
