پی ٹی آئی آزاد عدلیہ، الیکشن کمیشن کیلئے مارچ کررہی ہے: بیرسٹر گوہر

لاہور( پاکستان خبر) چیئرمین پی ٹی آئی بیرسٹر گوہر نے کہا ہے کہ تحریک انصاف آزاد عدلیہ اور آزاد الیکشن کمیشن کے قیام کے لیے مارچ کررہی ہے۔لاہور ہائیکورٹ بار میں وکلا کنونشن سے خطاب کرتے ہوئے بیرسٹر گوہر نے کہا کہ بانی پی ٹی آئی جھوٹے مقدمات میں جیل میں قید ہیں، ہمیں دیوار سے نہ لگایا جائے۔انہوں نے کہا کہ صوبوں سمیت دیگر مسائل کے حل کے لیے اسمبلی میں باقاعدہ بحث کرائی جائے تاکہ معاملات کو آئینی اور جمہوری طریقے سے حل کیا جاسکے۔وکلا کنونشن سے خطاب کرتے ہوئے حامد خان نے کہا کہ 26ویں اور 27ویں آئینی ترامیم عدلیہ کو کنٹرول کرنے کے مقصد سے لائی گئیں۔ان کا کہنا تھا کہ جن افراد کو منصف مقرر کیا جارہا ہے وہ انصاف فراہم کرنے کی صلاحیت نہیں رکھتے۔ حامد خان نے سوال اٹھایا کہ جب وزیر داخلہ خود کہتے ہیں کہ نظام ناکام ہوچکا ہے تو پھر وہ اپنے عہدے پر کیوں موجود ہیں؟