پی ٹی آئی کا 27 ستمبر مارچ، خیبرپختونخوا میں 12 مقامات پر دھرنوں کا منصوبہ

پشاور( پاکستان خبر) تحریک انصاف نے 27 ستمبر کو اسلام آباد کی جانب مارچ کے لیے خیبرپختونخوا میں مختلف مقامات پر دھرنوں اور کیمپوں کا منصوبہ تیار کرلیا۔ذرائع کے مطابق صوبے کے 12 مقامات پر دھرنے دیے جائیں گے، جبکہ اسلام آباد کی جانب مرحلہ وار پیش قدمی کی حکمت عملی ترتیب دی گئی ہے۔ منصوبے کے تحت صوبے کی حدود میں موٹروے اور جی ٹی روڈ کے مختلف حصے بند کیے جانے کا امکان ہے۔پشاور، خیبر، نوشہرہ اور اکوڑہ خٹک کی جانب سے اٹک پل، جبکہ ملاکنڈ، صوابی، مردان اور چارسدہ میں موٹروے پر دھرنوں کا منصوبہ بنایا گیا ہے۔ جنوبی اضلاع کے لیے خوشحال گڑھ میں دھرنے کی تجویز ہے۔پارٹی تنظیموں کو دھرنوں اور کیمپوں کے مقامات سے آگاہ کردیا گیا ہے، جبکہ حتمی حکمت عملی طے کرنے کے لیے وزیراعلیٰ سہیل آفریدی نے کل پشاور میں اجلاس طلب کیا ہے۔ہری پور میں حطار، خانپور، جھاری کس اور مکھنیال، ہزارہ موٹروے پر کیمپ قائم کیے جائیں گے۔ ایبٹ آباد میں باریان اور کوہالہ، صوابی میں ٹوپی اور ایم این موٹروے کے مقامات بھی مقرر کیے گئے ہیں۔نوشہرہ میں خیرآباد کنڈ اور اٹک پل، لکی مروت میں کنڈل جبکہ کوہاٹ میں خوشحال گڑھ کو کیمپوں کے لیے مختص کیا گیا ہے۔ قومی و صوبائی اسمبلی کے تمام ارکان اور سینیٹرز کو کیمپوں میں شرکت اور انتظامات کی ذمہ داری سونپی گئی ہے۔ذرائع کے مطابق ہر ضلع کی انتظامیہ کی جانب سے کیمپوں میں موجود کارکنوں کے لیے خوراک، پینے کے پانی اور دیگر ضروری اشیا کا بندوبست کیا جائے گا۔پارٹی ذرائع کا کہنا ہے کہ 27 ستمبر کو اسلام آباد مارچ کا فیصلہ برقرار ہے، جبکہ کیمپوں کے قیام کا مقصد کارکنوں کو ضروری سہولیات فراہم کرنا ہے۔ منصوبے کے مطابق مارچ کا راستہ جہاں روکا جائے گا، وہیں دھرنا دیا جائے گا۔وزیراعلیٰ خیبرپختونخوا سہیل آفریدی پشاور سے مارچ کی قیادت کریں گے۔