لاہور( پاکستان خبر) پاکستان تحریک انصاف کی سیاسی کمیٹی نے 4 اکتوبر کو لانگ مارچ شروع کرنے کی منظوری دے دی۔ چیئرمین بیرسٹر گوہر کی زیر صدارت اجلاس میں لانگ مارچ، خیبرپختونخوا حکومت سے متعلق ممکنہ وفاقی اقدامات اور دیگر سیاسی امور کا جائزہ لیا گیا۔ذرائع کے مطابق وزیراعلیٰ خیبرپختونخوا سہیل آفریدی جنوبی اضلاع سے مارچ کا آغاز کریں گے، جبکہ کئی ہفتوں کی سیاسی سرگرمیوں کے بعد قافلے کو اسلام آباد لایا جائے گا۔ مارچ کے حتمی پڑاؤ کا فیصلہ بعد میں کیا جائے گا۔پی ٹی آئی کی سینئر قیادت نے بھی وزیراعلیٰ کو مارچ شروع کرنے کی منظوری دے دی ہے۔ ذرائع کا کہنا ہے کہ صوبائی حکومت کے خلاف وفاقی سطح پر کسی اقدام کی صورت میں احتجاجی ردعمل دیا جائے گا، جبکہ ہنگامی حالت یا گورنر راج نافذ ہونے کی صورت میں گورنر ہاؤس کے باہر احتجاج کا اعلان کیا گیا ہے۔ذرائع کے مطابق ممکنہ وفاقی اقدامات کو عدالت میں چیلنج کرنے کیلئے قانونی ماہرین پر مشتمل ٹیم بنانے کی بھی منظوری دی گئی ہے۔
