اسلام آباد (پاکستان خبر) وزیر دفاع خواجہ آصف نے کہا ہے کہ پاکستان تحریک انصاف کی جانب سے 27 ستمبر کو اسلام آباد مارچ کی کوشش آخری ہوگی، اس کے بعد وہ دوبارہ وفاقی دارالحکومت کا رخ نہیں کر سکیں گے۔نیویارک میں وزیراعظم شہباز شریف کے وفد میں شامل خواجہ آصف نے ایک انٹرویو میں کہا کہ پی ٹی آئی رہنما اسلام آباد کو سومنات سے تشبیہ دے رہے ہیں، جبکہ اسلام آباد ایک بڑی اسلامی اور ایٹمی ریاست کا دارالحکومت ہے۔ انہوں نے کہا کہ یہ پی ٹی آئی کی فیصلہ کن کوشش ہوگی، تاہم یہ بھی ممکن ہے کہ وہ احتجاج کیلئے آئیں ہی نہ۔پی ٹی آئی نے 27 ستمبر کو اسلام آباد مارچ کا اعلان کر رکھا ہے، جبکہ وفاقی حکومت کے وزرا کا کہنا ہے کہ مظاہرین کو دارالحکومت میں داخل ہونے کی اجازت نہیں دی جائے گی۔وزیراعلیٰ خیبر پختونخوا سہیل آفریدی نے کہا ہے کہ حکومت نے احتجاج روکنے کی کوشش کی تو نوجوان سخت ردعمل دیں گے، جبکہ پی ٹی آئی خیبر پختونخوا کے صدر جنید اکبر بھی حکومت کو احتجاج دبانے کی صورت میں ردعمل سے خبردار کر چکے ہیں۔دوسری جانب پی ٹی آئی کی سابق رہنما فوزیہ قصوری نے کہا کہ احتجاج کی آڑ میں اسلام آباد پر حملے کی بات کرنے والا پاکستان کا دوست نہیں۔ ان کا کہنا تھا کہ احتجاج ضرور کیا جائے لیکن ریاست اور افواج کے خلاف مہم چلانے کے بجائے خیبر پختونخوا میں حکومتی پالیسیوں پر توجہ دی جائے۔
