پی ٹی آر او ترمیمی بل 2026 میں وضاحت اور ترامیم کا فیصلہ، ابہام دور کیا جائے گا: شزا فاطمہ

 اسلا م آباد( ویب ڈیسک)وفاقی وزیر برائے آئی ٹی و ٹیلی کمیونیکیشن شزا فاطمہ خواجہ نے پاکستان ٹیلی کمیونیکیشن ری آرگنائزیشن ترمیمی بل 2026 میں ضروری ترامیم کا عندیہ دیتے ہوئے کہا ہے کہ بل کے متن میں موجود ابہام اور وضاحت طلب نکات کو دور کیا جائے گا۔نجی ٹی وی کے ایک پروگرام میں گفتگو کرتے ہوئے انہوں نے کہا کہ مجوزہ قانون میں شامل بعض الفاظ اور شقوں کی وضاحت ضروری ہے، اسی لیے مناسب ترامیم کی جائیں گی تاکہ کسی قسم کی غلط فہمی باقی نہ رہے۔وفاقی وزیر کے مطابق زمین کے اوپر ٹیلی کمیونیکیشن انفراسٹرکچر کی تنصیب سے متعلق شقوں میں کنفیوژن پایا جاتا ہے، جسے دور کرنے کے لیے عملی اقدامات کیے جا رہے ہیں۔انہوں نے 5 کروڑ روپے تک جرمانے سے متعلق خدشات کی وضاحت کرتے ہوئے کہا کہ یہ جرمانہ صرف اس صورت میں عائد ہوگا جب زمین یا جائیداد کے مالک اور متعلقہ فریق کے درمیان باہمی رضامندی سے ہونے والے معاہدے کی خلاف ورزی کی جائے۔