راولپنڈی( پاکستان خبر) دہشت گردی کے خلاف جنگ میں پاک فوج اور پولیس کی خدمات اور قربانیوں کو عوام کی جانب سے بھرپور سراہا گیا، جبکہ سکیورٹی فورسز اور شہریوں کے درمیان تعاون کا اظہار بھی سامنے آیا۔کور کمانڈر پشاور نے ضلع دیر کا دورہ کرکے پولیس افسران اور جوانوں سے ملاقات کی۔ اس موقع پر آئی جی خیبر پختونخوا، دیگر اعلیٰ پولیس افسران اور سول حکام بھی موجود تھے۔ کور کمانڈر نے دہشت گردی کے خلاف جاری کارروائیوں میں خیبر پختونخوا پولیس کی قربانیوں اور کردار کو خراج تحسین پیش کیا۔دوسری جانب پاک فوج کے جنرل آفیسر کمانڈنگ نے لکی مروت بازار کا دورہ کیا، جہاں مقامی لوگوں نے ان کا پرتپاک استقبال کیا۔ پاک فوج کی جانب سے ضرورت مند خاندانوں میں راشن تقسیم کیا گیا جبکہ ڈیوٹی پر تعینات پولیس اہلکاروں کو نقد انعامات دیے گئے۔دورے کے دوران جنرل آفیسر کمانڈنگ نے بچوں سے شفقت کا اظہار بھی کیا۔ مقامی آبادی نے سکیورٹی فورسز کے ساتھ تعاون اور پاک فوج پر مکمل اعتماد کا اظہار کیا۔پاک فوج کی عوامی رابطہ سرگرمیوں اور شہریوں کے مثبت ردعمل سے سکیورٹی فورسز اور عوام کے درمیان مضبوط تعاون کی عکاسی ہوتی ہے۔
