وزیراعلیٰ پنجاب مریم نواز شریف نے بیواؤں اور یتیم بچوں کے لیے شفاف ڈیجیٹل ’رحمت کارڈ‘ کا آغاز کردیا

لاہور(پاکستان خبر) پاکستان میں پہلی بار وزیر اعلیٰ پنجاب مریم نواز شریف نے بیواؤں اور ان کے یتیم بچوں کی سرکاری کفالت کے لیے شفاف ڈیجیٹل نظام تیار کر لیا ہے۔اس اقدام کے تحت پنجاب میں بیواؤں اور یتیم بچوں کے لیے ’وزیراعلیٰ پنجاب رحمت کارڈ‘ متعارف کرانے کا فیصلہ کیا گیا ہے۔ اس پروگرام کے تحت مستحق خاندانوں کو ایک لاکھ روپے تک براہِ راست مالی امداد فراہم کی جائے گی۔وزیر اعلیٰ پنجاب رحمت کارڈ پہلے مرحلے میں 50 ہزار سے زائد بے آسرا گھرانوں کی معاشی ڈھال بنے گا، اور باقاعدہ آغاز عید کے فوراً بعد کیا جائے گا۔ بیوہ خواتین کو ایک لاکھ روپے اور یتیم بچوں کو 25،25 ہزار روپے فراہم کیے جائیں گے۔وزیراعلیٰ پنجاب رحمت کارڈ کے لیے موبائل ایپلی کیشن، ویب پورٹل، کال سینٹر اور آفس آف زکوٰۃ کے ذریعے رجوع کیا جا سکے گا۔ صوبائی معاون خصوصی برائے عشر و زکوٰۃ راشد نصر اللہ نے پروگرام پر تفصیلی بریفنگ دی۔وزیر اعلیٰ مریم نواز شریف نے کہا کہ پنجاب میں بیوہ اب محتاج نہیں، ریاست کی ذمہ داری ہے کہ بیوہ کو خیرات نہیں بلکہ باوقار حق ملے۔ انہوں نے کہا کہ صوبے کے وسائل سے ہر فرد کا حق پہنچانے کے لیے تمام اقدامات کیے جائیں گے اور بیوہ خواتین کو خود روزگار کی راہ پر گامزن کیا جائے گا۔مریم نواز شریف نے مزید کہا کہ اس پروگرام کے ذریعے بیوہ خواتین اور بچے مالی خود مختاری کے ساتھ باوقار زندگی گزار سکیں گے۔