پنجاب حکومت کا ’شی تھریڈز‘ منصوبہ، دیہی خواتین کی معاشی خودمختاری کے لیے 310 ملین روپے مختص

لاہور (پاکستان خبر) وزیراعلیٰ پنجاب مریم نواز شریف کے انیشی ایٹو کے تحت ’شی تھریڈز‘ پروگرام کے لیے 310 ملین روپے کا بجٹ مختص کیا گیا ہے۔یہ منصوبہ ٹیکسٹائل سیکٹر میں دیہی خواتین کی معاشی خودمختاری اور ہنرمندی کے فروغ کے لیے شروع کیا گیا ہے، جس کا مقصد خواتین کو روزگار کے بہتر مواقع فراہم کرنا ہے۔پروگرام کے تحت صوبے بھر کے دیہات سے تعلق رکھنے والی 18 سے 45 سال کی مڈل پاس خواتین حصہ لے سکتی ہیں۔ تربیت کے دوران شرکاء کو ماہانہ وظیفہ اور ٹرانسپورٹ الاؤنس بھی دیا جائے گا۔حکام کے مطابق اس منصوبے میں ٹیکسٹائل انڈسٹری سے متعلق 10 مختلف تربیتی کورسز شامل کیے گئے ہیں، جن میں اسٹیچنگ، کوالٹی کنٹرول، کٹنگ، ڈرافٹنگ اور مرچنڈائزنگ جیسے شعبے شامل ہیں۔گزشتہ دو برسوں میں اس پروگرام کے تحت ہزاروں خواتین تربیت مکمل کر چکی ہیں، جن میں سے متعدد کو فوری طور پر روزگار بھی حاصل ہوا ہے۔حکام کا کہنا ہے کہ اس وقت بھی بڑی تعداد میں خواتین مختلف کورسز میں تربیت حاصل کر رہی ہیں، جبکہ آئندہ سال مزید خواتین کو اس پروگرام کا حصہ بنایا جائے گا۔وزیراعلیٰ پنجاب نے کہا ہے کہ حکومت کا مقصد خواتین کو مالی طور پر خودمختار بنانا ہے، اور ہنرمند خواتین ملکی معیشت میں اہم کردار ادا کر سکتی ہیں۔