اسلام آباد( ویب ڈیسک) وفاقی وزیر منصوبہ بندی و ترقی احسن اقبال نے کہا ہے کہ کوانٹم ویلی پاکستان کا افتتاح ملک کیلئے ایک اہم پیش رفت اور جدید ٹیکنالوجی کے میدان میں قومی صلاحیت بڑھانے کی جانب قدم ہے۔کوانٹم ویلی پاکستان کی افتتاحی تقریب سے خطاب کرتے ہوئے احسن اقبال نے کہا کہ اس منصوبے کا آغاز پاکستان کو ٹیکنالوجی کے ایک نئے مرحلے کی طرف لے جانے کی کوشش ہے۔انہوں نے کوانٹم ویلی پاکستان اور کیمبرج اختراعی مرکز کے درمیان معاہدے کو خوش آئند قرار دیتے ہوئے کہا کہ اس شراکت داری سے نوجوانوں کو جدید ٹیکنالوجی کی تربیت اور مواقع فراہم کرنے میں مدد ملے گی۔وفاقی وزیر کے مطابق کوانٹم ویلی کے قیام سے نئے کاروباری منصوبوں اور جدید ٹیکنالوجی سے وابستہ کاروبار کو فروغ ملے گا، جبکہ ملک میں ہائی ٹیک شعبے کیلئے نئی مہارتیں بھی پروان چڑھیں گی۔احسن اقبال نے کہا کہ ’معرکہ حق‘ میں کامیابی سے پاکستان کو عالمی سطح پر نئی شناخت ملی، جبکہ ایران اور امریکا کے درمیان جنگ بندی کیلئے بھی پاکستان نے اہم کردار ادا کیا۔انہوں نے مزید کہا کہ دفاع اور سفارت کاری میں کامیابی کیلئے مضبوط معیشت بنیادی حیثیت رکھتی ہے، اس لیے ٹیکنالوجی، نوجوانوں کی صلاحیتوں اور جدید کاروباری شعبوں کی ترقی پر توجہ دینا وقت کی اہم ضرورت ہے۔
