لاہور ( سپورٹس ڈیسک)جنوبی افریقا کے مایہ ناز فاسٹ بولر کگیسو ربادا ٹانگ کی ہیمسٹرنگ انجری کے باعث آسٹریلیا کے خلاف اگلے ماہ شیڈول 3 ایک روزہ میچز کی سیریز میں حصہ نہیں لے سکیں گے۔آسٹریلیا کے خلاف 9 اکتوبر سے شروع ہونے والی 3 ٹیسٹ میچز کی سیریز میں بھی ربادا کی شرکت ان کی فٹنس سے مشروط کردی گئی ہے۔جنوبی افریقی کرکٹ بورڈ کے مطابق ربادا دائیں ٹانگ کی ہیمسٹرنگ انجری سے صحت یابی کے ابتدائی مرحلے میں ہیں اور انہیں مزید کم از کم ساڑھے 4 ہفتے کھیل سے دور رہنا ہوگا۔بورڈ نے انجری کی نوعیت یا اس کی شدت کے بارے میں تفصیلات فراہم نہیں کیں، تاہم ٹیسٹ سیریز کے قریب آنے پر ان کی بحالی کی صورتحال کا جائزہ لے کر دستیابی کا فیصلہ کیا جائے گا۔کگیسو ربادا کی انجری جنوبی افریقی ٹیم کے لیے بڑا دھچکا ہے، کیونکہ وہ ٹیسٹ کرکٹ میں ٹیم کے اہم ترین فاسٹ بولرز میں شمار ہوتے ہیں۔2025ء کی عالمی ٹیسٹ چیمپئن شپ کے فائنل میں آسٹریلیا کے خلاف ربادا نے 9 وکٹیں حاصل کرکے جنوبی افریقا کی تاریخی کامیابی میں نمایاں کردار ادا کیا تھا۔ربادا کی عدم موجودگی میں لنگی نگیدی، مارکو جینسن اور کوربن بوش پر بولنگ کی ذمہ داری مزید بڑھ جائے گی، جبکہ کوینا مافاکا، ڈین پیٹرسن اور ویان ملڈر بھی متبادل کے طور پر موجود ہیں۔کافی عرصے سے ٹیسٹ کرکٹ سے دور اینرک نورکیا اور جیرالڈ کوئٹزے کو بھی ٹیم میں واپسی کا موقع مل سکتا ہے۔
