اسلام آباد( پاکستان خبر)ملک بھر میں حالیہ بارشوں اور بالائی علاقوں میں برفباری کے باعث موسم ایک بار پھر سرد ہو گیا ہے جبکہ مختلف علاقوں میں جانی و مالی نقصانات بھی رپورٹ ہوئے ہیں۔بلوچستان کے علاقوں چمن، پشین، قلعہ عبداللہ، کوہلو اور نصیرآباد میں موسلا دھار بارش اور ژالہ باری کے بعد سیلابی صورتحال پیدا ہو گئی، جہاں فرنٹیئر کور نے امدادی کارروائیاں انجام دیں۔دوسری جانب آزاد کشمیر، گلگت بلتستان، ناران، سوات اور زیارت کے پہاڑی علاقوں میں اپریل کے دوران برفباری نے سردی کی شدت میں اضافہ کر دیا۔سندھ اور پنجاب کے مختلف اضلاع میں بھی وقفے وقفے سے بارش جاری رہی، جبکہ ڈیرہ غازی خان اور فورٹ منرو میں ژالہ باری کے باعث ندی نالوں میں طغیانی آ گئی۔خیبرپختونخوا کے مختلف علاقوں میں بارشوں سے صورتحال متاثر رہی، پشاور میں نالوں کا پانی سڑکوں پر آ گیا جبکہ مختلف حادثات میں چار افراد جاں بحق اور انیس زخمی ہوئے۔پی ڈی ایم اے کے مطابق پچیس مارچ سے اب تک بارشوں کے نتیجے میں تیس افراد جاں بحق اور پچاسی زخمی ہو چکے ہیں، جبکہ ایک سو چالیس گھروں کو نقصان پہنچا جن میں سے ایک سو پندرہ کو جزوی اور پچیس مکمل طور پر تباہ ہوئے۔متاثرہ علاقوں میں بنوں، ایبٹ آباد، کوہاٹ، نوشہرہ، باجوڑ، لکی مروت، کرم، ہنگو، شانگلہ، بونیر، مالاکنڈ، دیر اپر، بٹگرام، شمالی وزیرستان اور ٹانک شامل ہیں جہاں امدادی سرگرمیاں جاری ہیں۔محکمہ موسمیات کے مطابق بارشوں کا موجودہ سلسلہ وقفے وقفے سے جاری رہے گا اور یکم سے چار اپریل تک مزید بارشوں کا امکان ہے۔
