لاہور، اسلام آباد(پاکستان خبر) ملک کے مختلف علاقوں میں بادلوں کی آمد کے بعد گرمی کی شدت میں نمایاں کمی دیکھنے میں آئی ہے، جبکہ محکمہ موسمیات نے لاہور سمیت پنجاب کے متعدد اضلاع میں بارشوں کی پیشگوئی کر دی ہے۔محکمہ موسمیات کے مطابق آج لاہور میں کم سے کم درجہ حرارت 28 ڈگری سینٹی گریڈ اور زیادہ سے زیادہ 37 ڈگری سینٹی گریڈ تک جانے کا امکان ہے، جبکہ موجودہ درجہ حرارت 31 ڈگری ریکارڈ کیا گیا ہے۔اعداد و شمار کے مطابق ہوا کی رفتار 10 کلومیٹر فی گھنٹہ اور ہوا میں نمی کا تناسب 52 فیصد تک پہنچ گیا ہے، جبکہ دوپہر کے اوقات میں بارش کے امکانات ظاہر کیے گئے ہیں۔دوسری جانب کراچی کے مختلف علاقوں میں بوندا باندی کے باعث موسم خوشگوار ہو گیا ہے، جہاں طارق روڈ، بہادر آباد، صدر، کھارادر، لیاقت آباد اور دیگر علاقوں میں بارش ریکارڈ کی گئی۔اسی طرح ایبٹ آباد میں طوفانی ہواؤں کے ساتھ بارش ہوئی، جبکہ سرگودھا، دریا خان، وزیرآباد، سانگلہ ہل، میانوالی اور دیگر علاقوں میں بھی بارش کے باعث گرمی کی شدت میں کمی آئی۔پی ڈی ایم اے کے مطابق آج سے پنجاب کے بیشتر اضلاع میں بارشوں کا امکان ہے جو 20 جون تک جاری رہ سکتا ہے۔ ادارے نے کمشنرز اور ڈپٹی کمشنرز کو الرٹ جاری کرتے ہوئے ممکنہ صورتحال سے نمٹنے کی ہدایت کی ہے۔محکمہ کے مطابق راولپنڈی، مری، گلیات، گوجرانوالہ، فیصل آباد، ملتان، ڈیرہ غازی خان، بہاولپور سمیت متعدد اضلاع میں بارشوں کی پیشگوئی کی گئی ہے۔
