اسلام آباد( پاکستان خبر)راولپنڈی اور اسلام آباد میں موسلادھار بارش کے بعد موسم خوشگوار ہوگیا۔محکمہ موسمیات کے مطابق گوالمنڈی میں 47، کچہری میں 44 اور پیرودھائی میں 28 ملی میٹر بارش ریکارڈ کی گئی، جبکہ نیوکٹاریاں میں 32، بوکرہ میں 27، پی ایم ڈی میں 23 اور شمس آباد میں 19 ملی میٹر بارش ہوئی۔ایم ڈی واسا کے مطابق نشیبی علاقوں میں عملہ بھاری مشینری کے ساتھ موجود ہے، جبکہ گزشتہ بارشوں کے بعد نالوں میں پیدا ہونے والی رکاوٹیں دور کر دی گئی ہیں۔ شہر کے نالوں اور نالہ لئی کی مسلسل نگرانی جاری ہے اور پانی کا بہاؤ معمول کے مطابق ہے۔دوسری جانب لاہور کے مختلف علاقوں میں بھی بارش ہوئی۔محکمہ موسمیات کے مطابق کمزور مون سون ہواؤں کے ساتھ مغربی ہواؤں کا سلسلہ بھی ملک کے شمالی علاقوں پر اثر انداز ہو رہا ہے، جس کے باعث آج اسلام آباد، پنجاب، خیبرپختونخوا، گلگت بلتستان اور کشمیر کے بعض علاقوں میں مزید بارش کا امکان ہے۔
